سألت مرشح إعادة عشان أعرف هيعمل إيه.. وإيه طريق العمل اللى هيمشى عليه.. وسألت إيه خطته للعلم والإصلاح.. وهيعمل إيه للوطن اللى الفساد زاد فيه.. ورأيه إيه فى السياسة ولجنة الأحزاب.. وهيعمل إيه للوزير لو قال كلام كداب.. وهيعمل إيه فى القانون اللى لغى الدستور.. وهيعمل إيه فى الطوارئ لو حصل إضراب.. لقيته بيبص لى وكلامى مش عاجبه.. وهز كتفه ولعّب لى كمان حاجبه..
وقالّى حيلك فاكرنى سعد باشا زغلول.. مين قبل منى سأل الوالى أو عاتبه؟.. أنا كل همى أطبق كرسى فى المجلس.. وأخطف لى خطفة وأقول بالنص يا أغلّس.. طب قول لى فيه ألف قبلى عملوا سيادتك إيه.. وقول لى مين قبل منى حلو وكويس.. والرأى عند الحكومة على الجميع ماشى.. والأمن عنده عصاية تسوق كبار وصغار.. لقيته قال الصراحة وجاب من الآخر.. ووصف لى حال البلد طلع ولد شاطر.. بيركب الموجة زى الكل ما هو راكب.. وقال لى هيه كده يا تعيشها يا تهاجر.. صعبت علىّ البلد ودموعى غلبتنى.. وعرفت ليه اليابان والهند سبقتنى.. وعرفت ليه البلد أحوالها فى النازل.. وليه كلاب الطريق فى قفايا عضتنى.
