قرّب قرب قرب قرب اوع تزوغ أو تتهرب
قرب خد لك حتة لحمة وأوع تفوتك قبل الزحمة
خد لك كيس تفاح متنقى أنجر فتة كبير وتسقى
واوع يفوتك شاى القهوة فرصة وجت لك عندك سهوة
واوع تسيب المكواة الصينى خد لك منها اتنين وادينى
والحق يللا علاج مجانى جوه المستشفى الألمانى
خد لك حاجة تحسن صوتك والحق قبل الدور ما يفوتك
قوم واتصور جنب الباشا يمكن تطلع يوم عالشاشة
ويشوفك أهلك وأصحابك وأما بتمشى الكل يهابك
واما الباشا يفوز بالمقعد أنت معاه حتقب وتصعد
والناس الشقيانة الباقية بتلف ومربوطة فى ساقية
ما بتفرقش معاها وعايشة جنب الحيط بتخاف م الطايشة
اسمع منى وفتح مخك ما تخليش الجهل يطخك
ادى الصوت للى بيستاهله واللى ف حبه لمصر اتجرب
الإسكندرية
