إيه اللى غيرنا؟.. مين اللى شال من صدورنا القلوب.. وحط طوب.. وحجر؟.. مين طفى نور الشمس.. مين خبى ضى القمر؟.. مين اللى زرع القهر.. جوا حشايا البشر.. مين اللى خلى الأرض.. تطرح مرار يا ناس.. مين غير ندا أو مطر؟.. مين اللى كسر ناى.. كان بيعزفنى.. مين بعد ما كسّروه.. لقيتنى كلى انكسر.. مين اللى توهنا؟ وشوهنا؟ وكرهنا.. فى كلمة حب تحمينا.. تقربنا.. تنسينا.. تهنينا؟.. إيه اللى غيرنا؟.. مين اللى مد إيديه وخد من روحى بهجتها.. وخد من عينى فرحتها.. وخد من عمرى حلم العمر؟..
إيه اللى غيرنا.. إيه اللى خلى البراح يبقى زنزانة.. إيه اللى خلى السنين أيامها بهتانة.. إيه اللى برد إيديه.. وانتى فى إيديه.. إيه اللى خلى حروفنا صقعانة.. إيه اللى ودانا.. لبلاد حجر ونحاس.. مش شكل دنيانا.. ما فيهاش كلامنا الجميل.. زى الأصول.. والعشرة.. وضنانا.. زى قسمنا زمان.. كان عيش وملح.. وحب.. إيه اللى نسانا؟.. إيه اللى عدانا.. بحور الود ورمانا.. على ضفة هجرها الناس.. هجرها الحب.. وساب الجرح جوانا.. يبكينا على الدنيا.. على الوحدة اللى حضنانا.. نسامرها وتجلدنا.. ونشكى وهى سمعانا.. إيه اللى مشانا.. فى ضلمة سكة حيرانة.. لا فيها شمعة بتنور.. ولا قنديل.. ولا نجماية سهرانة.. إيه يا حبيبتى نسانا.. دعا كروان فى فجرية.. وفكرنا بكل أمانى هجرانا.. وخلانا.. نتوه فى زحمة الأيام.. وننسى إن ربنا معانا؟
مهندس
