وانت مسافر لبلدى.. سلملى على الحبايب
خليهم يعذورونى.. لو عنهم كنت غايب
سلملى ع الشوارع.. والناس الطيبين
وصّل صوتى وسلامى.. لكل المصريين
نور ف كنيستى شمعة.. وادعيلى قول آمين
وأمانة عليك تقرالى.. الفاتحة ف الحسين
عدى على مدرستنا.. اللى فى آخر حارتنا
وماتنساش وانت راجع.. تطمنى على بيتنا
أمانة عليك تسلم.. على مصر وعلى أحبابها
أول ما توصل ليها.. ميل وبوس ترابها
متغرب عنها لكن.. على طول جايب سيرتها
هون عليا وهاتلى.. حاجة من ريحتها!
