هو إنت مصرى وللا إيه ودى مصر بلدك وللا إيه
قوللى مين غيرك يا مصرى يحط مصر جوه عينيه
خلّى مصر فى القلم بوسها م الإيد والقدم
مصر هى الباقية لينا وإحنا مصيرنا للعدم
يا أهل مصر يا ناخبين بلدنا عايزة المخلصين
اللى يعلو من شأنها ويبعدوا عنها الطماعين
يا ابن بلدى صوتك أمانة وعشان مصر أرض الكنانة
إدى صوتك للأمين فى ناس بتجرى ورا الحصانة
دقق على قد ما تقدر متقولش مكتوب ومقدر
وعشان مصر أم الدنيا استفتى قلبك واستفسر
مفيش مكان هنا للضعيف فكر بعقلك النضيف
ولو صحيح بتحب مصر أشر - ع الاسم الشريف
خلّى بالك م الإغراءات بتبقى وقت الانتخابات
ولما ينجح ممكن تشوفه بس بعد خمس سنوات
لو مصر فعلاً غالية عليك حط مصر قدام عينيك
واختار واحد ينوب عنك يستاهل صوتك ويسأل عليك
من غير زيطة وزمبليطة مصر كبيرة ع الخريطة
وعشان مصر حبيبة قلبى علم على الناس البسيطة
اختيارك هو البداية لو سليم نبدأ حكاية
حكاية المصرى الأصيل اللى عاشق مصر للنهاية
الجيزة
