الفاتحة اقراها إنت وهيه.. على أزهى عصور الحرية.. بقى صعب إنك تكتب كلمة.. من غير ما تطش الملوخية.. هتخاف على نفسك من إيدهم.. مع إنك عارف إنك سيدهم!.. مهو ليهم ضهر بيسندهم.. ودا صعب إن يكون لك دية.. الفاتحة اقراها أنت وهيه.. ومادام بنسلم بسهولة.. من غير لا مقاومة ولا بطولة.. وإيدينا كإنها مشلولة.. راح نفضل حدوتة منسية.. دى الكلمة الأمل اللى بقالنا.. عايز تقتلها وتقتلنا.. ولإمتى هنغمض عينا.. وهنرسم أحلام وردية.. الفاتحة اقراها أنت وهيه.. إنسى الأخبار الليلية.. وكفاية النشرة الصباحية.. هتقولك الدنيا أهى ماشية.. وصباح الخير يا اللى معانا.. طاب إيه أخبار مشروع توشكى؟.. ما الكروان غنى وصحانا.. وهنرجع ونكمل نومنا.. وزى ما بنام زى ما قومنا.. ما خلاص بيعتونا هدومنا.. ويا صباح الخير يا اللى معانا!
