ياللى نزل اسمك فى القايمة ونويت تدخل الانتخابات
سوى فى الدايرة الأولى والثانية عن عمال أو حزب فئات
ومرشح عن مقعد فردى أو على قايمة من القايمات
عمل إن كان أو أمة ووطنى أو داخل وفد البشوات
رمز النجمة أو النظارة وبأى م التسميات
واتكلمت بكل سلاسة عن تحقيقك للمجالات
فرصدت عهودك ووعودك سهلة عظيمة على الأفيشات
راح تبذل للشعب جهودك لجلن نقضى على الطبقات
وتعدد فى قضايا حسودك علشان تكتسح الأصوات
مع كم بلطجى يسندوا عودك للتأمين ساعة الخناقات
وتمضى على الطلبات ببرودك وكأن التوقيع شفاعات
والشبان تهتف بخلودك تشبع م النسوان دعوات
والأزمة اتحلت بوجودك كل ده شفوى وفى الندوات
بكلام يشهد لك بصعودك أصل ما أسهلها الكلمات
هنعلى ونبنى وهنعمر وهنمحى كلمة أزمات
وعن سواعدنا الكل يشمر ونحطم كل العقبات
ونخطط لبلدنا لبكرة وهنبقى أحسن م الخواجات
شقة لكل شبابنا الواعد والأزمة اتحلت يا بنات
وكم مصنع للجيل الصاعد ومفيش عاطل ولا عاطلات
واللحمة هتكون مجاناً بعد ما كانت بالدولارات
ولكل موظف شيك نافز وهتصرف تلات علاوات
ونزوده بدلات وحوافز وياخد حظه من الإجازات
والصيحات تتعالى وتصرخ يحيا الراجل أبوالكرامات
لا مش كده يا اخوانا نرشح أى كلام من أى طريق
قبل م تيجى وراح ننتخبك لينا عليك شروط ومواثيق
وحاجات ضرورية تلبيها لجلن نختارك كرفيق
تحضر فى المجلس وتناقش تحت القبة بدون تصفيق
وتطالب بأهم مطالب أمر يكون محض التطبيق
وبعزمك وبحزمك تؤمر إنه يكون موضع تحقيق
مش بس كلام فض مجالس ووعودك شفوى تبل الريق
وبكده كلنا راح نختارك وتنول إعجاب كل فريق
وتفوق الكل بأصواتك تتكدس بيها الصناديق
والنصر يحالفك فى حياتك والفوز لك هيكون تصديق
مدرس عربى بمدرسة جمال عبدالناصر الثانوية
