دورنا على القمر المصرى وسألنا جميع السماوات
وبعتنا دلالة بصاروخ لفت كل المدارات
وقالولنا قمركم مسروق والسر بتاعه فى صندوق
لو كنتوا انتوا اللى صنعتوه كان عاش بدل السنة ألوفات
وفتحنا المندل وقالولنا القمر المصرى مخطوف
علشان مانشوفش عليه صوره ولا يبقى طريقنا معروف
ولا نعرف إيه دار حوالينا ولا فين ثرواتنا فى أراضينا
ولا نقدر نتقدم خطوة ولا نسمع حاجة ولا نشوف
من بعد ما بهدلنا ولادنا وقفلنا معامل الجامعات
وقفلنا بقفل على عقولهم وفتحنا لهم معتقلات
وحكمنا فى علمائنا الجهلة! ومنحنا النياشين للجهلة!
وخربنا مزارع ومصانع! وزرعنا الأرض كلبشات!
بيقولوا القمر المصرى من حقه يهرب ويغور
من بعد سنين عاشها فى ضلمه من حقه يهاجر للنور
علشان الشعب لابس عمة وماعدش رجولة ولا همة
والشعب لبس فى إيديه حدوة وفى دماغه هايلبس طرطور
