لسانى المسحوب بيحوم على خربان بيتى.. بيتى المدهون بالزيت وبلاط سيراميك وقيشانى.. ومراتى وأطفالى البيبى.. اسكت يا لسانى علشانى.. علشان يتربى البيبى فى أحضانى.. إيه يعنى يضربوا غزة ولا الضفة ولا رام الله.. مهو طول عمرنا واحنا تملى نمد لبره.. إيه يعنى أمريكا تحتل العالم.. اسكت يا لسانى بلاش تتلائم.. اسكت يا لسانى اعمل معروف.. مهى كل الناس سامعة وبتشوف.. وأهى ناس ياما كتير ماتت من الخوف.. واللى بيحصل فيهم.. ولا انت عايزنى أعمل زييهم.. واخرب بيتى المدهون بالزيت.. وبلاط سيراميك وقيشانى.. ومراتى وأطفالى البيبى.. إيه يعنى بغداد انهارت.. زى كل الأمة العربية ما نالت؟.. مين يقدر يصرخ وينادى؟..
ويقول أنا أضحى بأولادى.. وبنفسى عشانك يا بلادى.. مهو كله نايم فى السكة.. خايف على نفسه وعلى الدكة.. يعنى انت إللى حتفتح عكة.. اسكت يا خى بلاش أفلام.. اشتراكية وإمبريالية وشيوعية وإسلام.. ومحدش فيهم عنده ضمير ولا دين.. إلا كلام فى كلام.. ما هى أحوالنا فى مصر كمان.. إيه يعنى شاويش يضرب غلبان.. إيه يعنى طبيب يهمل عيان.. إيه يعنى قطر يفوت فى أخوه.. إيه يعنى إهمال مسؤول وسابوه.. إيه يعنى يبيعوا كل أملاكنا.. إيه يعنى الأغراب يبقوا ملوكنا.. إيه يعنى ألف يموتوا فى عبارة.. ولا حتى أطفال تحت عمارة.. ولا صخرة تقع فى مقطم.. ولا مجلس شورى بيتحطم.. اسكت يا لسانى.
