خلى صليبك ويا هلالى.. والإنجيل ويا القرآن.. لجل نحلّق فوق فى العالى.. خير ومحبة ونور وأمان.. ما هى أفراحك من أفراحى.. حتى جراحك هى جراحى.. إحنا نسيج التوب المصرى.. نور فى ضمير العالم يسرى.. توب الحب الصافى الغالى.. خلى صليبك ويا هلالى.. إحنا إلهنا الخالق واحد: جل جلاله مش إلهين.. إحنا وطنّا الطيب واحد: عمره ما كان أبداً وطنين.. يبقى منين ها تجينا الفرقة.. حد يقوللى هاتيجى منين؟.. إحنا نسيج التوب المصرى.. نور فى ضمير العالم يسرى.. توب الحب الصافى الغالى.. خلى صليبك ويا هلالى.. شوف كام مسجد جنب كنيسة.. شوف كام معبد.. شوف كام دير.. وحدة حقيقى عظيمة نفيسة.. طارحة سنابل نور مع خير.. إحنا نسيج التوب المصرى.. نور فى ضمير العالم يسرى.. توب الحب الصافى الغالى.. خلى صليبك ويا هلالى.
البساتين- أجا- دقهلية
