إيد النور يا عم.. خلى عندك دم.. طول ما الخوف ده فيكوا وفىّ.. أمخاخنا هتفضل مطفية.. واما نبطل نبقى هفية.. هيقيد النور المقطوع.. ليه تستنى لحد ما يجى النور ويقيد.. النور عايز حد يجيبه كده بالإيد.. لو حابب تستنى براحتك. بس أكيد.. هتعيش طول عمرك ملطوع.. الأحمال زايدة ما هى زايدة بقالها سنين.. أنا مش عارف مين حمله زايد على مين!.. انتى معايا واللا مع الناس التانيين.. أنا يظهر فيكى مخدوع.. ليه يا امه سايبانى لجوزك؟.. مكشرة وبتلوى فـ بوزك.. مش بالاقيكى لما باعوزك.. أنا قلبى منك موجوع.. السوس خلى عضمك خوخ.. كل دى عتمة دى حاجة تدوخ.. وده شىء زاد عن حده وبوخ.. خلى الواحد بقى مفقوع.. ليه كل لقمة بتتغمس كدب وتعتيم؟ غادة الكاميليا وأرمان دوفيل بقوا من بهتيم.. ومافيش وفاء حتى ما بين الصحبة الأنتيم.. والعتمة كاتمة على الموضوع.. نفسى الهلال يطلع بقى ويبان الضى.. وأمشى فـ طريق الجلجثة ولا أقولشى آى.. ويكون لى حرية أكون ميت أو حى.. من غير ما يتقال لى ممنوع..
