الصبر مفتاح الهرم.. واللى اتخرم.. ممكن يبات ملحوم.. وأبوهولنا لم هدوم.. ساب البلد سافر.. والشعب بيعافر.. رمشه ما داق النوم.. كان بانى برج حمام.. للفرحة والأحلام.. وآهى ماتت الأحلام.. عشش مكانها البوم.. دى حكومة شرعية.. والإخوة حرامية.. وشباب فى بحر غريق.. والموت يدور ويحوم.. وبلدنا متباعة.. والله يا جماعة.. ذايعينها فى إذاعة.. من طابا للسلوم.. قولت أشتكى بقولى.. هزيت أنا طولى.. ف طريقى للمسؤول.. ما ادونى حتى معاد.. لأ واللى غطى وزاد.. قالوا فقير محروم.. ما إنتوا اللى فقرنى.. يا عصابة سرقانى.. الظلم بهدلنى.. قضيت سنينى بصوم.. طافح أنا الكوتة.. وحسابى ع النوتة.. وده غيرى كان باشا.. مش حقد لأ حاشا.. بتفطميه بسكوت.. وأنا بالوجع مفطوم.. من صغرى متقطم.. والذل بيقطم.. ف إرادتى وعزيمتى.. يا مبعترة قيمتى.. عبارة ومقطم.. ومشيلانى هموم.. ظلمانى ف حقوقى.. مش لاقى حق أعيش.. حبك وكان طوقى.. تاخدى ومابتديش.. طب ليه أنا أديكى.. وأعيش وأموت فيكى.. وإنتى اللى كسرانى.. بيعانى علشانهم.. والدور بقى دوار.. الجنة هاتخونهم.. ويدخلوكى النار.. وتجينى ساعتها.. هاتحلفينى أقوم.. مش كان قيامى غلط.. ولا كنش ليه لزوم حدفانى لحم ودم.. جوه ف قلب اليم.. وتقولى لى أعوم.. ولأى شط هاروح.. ده أنا كل قلبى جروح.. وعتابى لو مسموح.. لا أنا حبى باقى لك.. ولا حبهم هايدوم.
