إزاى أكون إنسان.. وانا غضبان.. زعلان.. قدامى ميت سجان.. وعمدان.. وعيون تبرق وانا غفلان.. إزاى أكون إنسان.. وانا ميت لون.. مليان ظنون.. مش قادر أقول تعبان.. مليش عنوان.. إزاى أكون إنسان.. وانا مضغوط.. مش مظبوط.. محتاج لقوة وسوط.. ومكبر صوت.. إزاى أكون إنسان.. أنا خايف.. باصص ومش شايف.. مش عارف.. فى السكة أنا الغلطان.. إزاى أكون إنسان.. وانا مهموم.. مكتوم.. ملفوف فى ميت بكرة.. وانا نكرة.. معرفش إيه بكرة.. غير انى كنت فى يوم.. مخلوق ملوش ذكرى.. إزاى أكون إنسان.. وانا جوايه شىء مبهم.. مشؤوم كما الغربان.. وزى اليوم.. نفسى أبات غالب.. مش مظلوم!
