ليه يا بلدى كده بشهادة أنا ضايع
ليل ونهار عالقهوة وأخذت لقب صايع
حاصل يا بلدى منك على ليسانس حقوق
مفيش فى بلدى وظيفة وهموت خلاص مخنوق
والناس بتقولى دايماً إنت فى التوهان
مع أنى غصب عنى عبد فقير غلبان
قاعد على الرصيف أنا وكل الشباب
والمسؤولين شغالة كفتة وحمام وكباب
نفسى يا بلدى مرة تقولى للمسؤول
وفر للمواطن حتى طبق الفول
دا المصرى غلبان بيرضى بالقليل
ولا عمره مرة يسرق ولا حتى يعيش ذليل
شوفت كمان فى بلدى مهندس شغال سواق
بيجرى على أكل عيشه وساكن كمان فى بولاق
مع إنى غيره فيه مهندسين كتير
ده يقرّب للمحافظ وده يقرب للوزير
بالوسطة شغالين ومرتاحين تمام
وأنا شايف العذاب وبرفع تعظيم سلام
نفسى مرة أشوف العدل فى المساواة
ولكل واحد وظيفة ويقول اللى جواه
والمصرى اللى على حق يقول للغلط لأ
ويركب الأتوبيس وكل يوم يتزق
بدل ما يموت شهيد من زحمة الطوابير
من غير ما حتى يسمع مرة كلمة حق
المشكلة يا بلدى بحبك وبموت فيكى
ولو مرة بردانة بقلبى أدفيكى
يا رب إنت العالم يا رب إنت الرزاق
عمرك ما بتنسى حد علشان إنت الخلاق
