عندى حكاية بسيطة.. عن بلد بسكانها.. وقعت من عالخريطة.. واتنازلت عن مكانها.. لدول لسه نونو.. وبتحبى بعيد عنها.. ما اللى ولادها يخونوا.. مين يلوم جيرانها.. تايهة يا ولاد الحلال.. وبالقطن سدين ودانها.. وليها حبة عيال.. بيتكلموا بلسانها.. محتكرين هبرها.. بيكسروا فى سنانها.. واقفين على قبرها.. بيخبطوا فى كفنها.. سبعة من ولادها.. ماطمرش فيهم لبنها.. بيقولوا القطر فاتها.. وراحت وراح زمنها.. قالوا عليها مريضة.. نشفت وجفت عيدانها.. جعلوا السرقة فريضة.. كتبوها فوق بيبانها.. كانت عظيمة وعفية.. وجنود ماتت عشانها.. غنولها يا بهية.. الله يجازى اللى هانها.. اسمها أم الحضارة.. تعرفها من أذانها.. بتفهم وبالأمارة.. عارفة كل اللى خانها.. أنا كنت عايش فيها.. وفى حضنها وحنانها.. أمانة اللى يلاقيها.. يقوللى فين عنوانها.
باكوس
