اللجنة جاهزة وكل شىء اتظبط.. صندوق جناب البيه وصل متربّط.. فوق نص نقل مقصّها متخبّط.. والدايرة قابضة وعم عبده اتعشى.. صاحبك قفل لك شارع السبتية.. و«البوكس» واقف جار وابور ميه.. لو حد مرّ مالهش عندك دية.. غير الحبايب والحبايب خشة.. حبة عيال ماسكين يفط ودياوله.. رابطين على ناصية محل مقاولة.. كرمش فى إيدك خمسمية وناوله.. صاحب المحل يهشهم بمقشة.. والزفة يا سيد الحبايب خارجة.. بعد العشا من بيت سنية العارجة.. تخزى عيون الحاسدين الزرجا.. منها بتوع أبريل ومارس كشة.. ما تخافش يا سيدنا ح تنجح تانى.. وح تدخل المجلس وتصبح جانى.. تيجى الحصانة تسلكك حلوانى.. بعدين على شط «التيميز» تتمشى.
