يا ممثلى الشعب يا مرشحين يا محبى مصر فى الأحزاب
يا فئات يا عمال يا مستقلين عاوزين نزاهة فى الانتخاب
خلّى وصولك للبرلمان يكون بحق مش اغتصاب
وانسى الوجاهة والهيلمان ما لهُمش لزمة يوم الحساب
بلاش هدفك يكون حصانة وتبقى سُلطة وليك أنياب
خليك سند لناس غلبانة وهات حلول لكل الشباب
كُتر الكلام ما يلزمناش اثبت وجودك أو انسحاب
ندوات شعارات ما تأكْلّناش نفذ وعودك تكسب ثواب
يا ريت نجدد فى الوشوش مش بس جلدة الكتاب
وياريت وشوش من غير رتوش الحالة مش ناقصة اكتئاب
لو هدفك تخدم دايرتك بلاش وعودك تبقى سراب
أنت بضميرك وهمتك هاتبقى أحسن النواب
لزمتها إيه مصاريف دعاية صور- يُفط واصله السحاب
عملك دعايتك فى النهاية مش بالفراخ ولا بالكباب
عاوزين معارضة بحق وحقيق حضور تمام ما فيش غياب
ومناقشة بالأعضاء تليق من غير زعيق أو سباب
يا مرشحين نداء أخير مع احترامى وبدون عتاب
مطلوب فقط صحوة ضمير مهما نعيش مصيرنا التراب
الجيزة
