نصيحة منى يا ابنى لك.. ولجل انابيها ابتليت.. رغم اللى مكتوب ع العلب.. أدمنتها حتى انتهيت.. وصاحبى كان هو السبب.. ندانى قال خدلك نفس.. مدام ف وشك فيه شنب.. ف يوم ح تبقى لك ونس.. دخن وسيبك م العبط.. دا كله عفر وانبسط.. مع إن ده أكبر غلط.. عفرتها وجريت وراها واشتريت.. والثمن اللى اندفع كان يبنى بيت.. وتفيد بإيه كلمة يا ريت.. وحدى عليه اللى جنيت.. من صغر سنى والمرض.. قصر كتير من خطوتى.. حسيت بعظمى ينقرض.. والشيب سبقنى لآخرتى.. لاخفت يوم على صحتى.. ولا فى احترام لأسرتى.. ولا بحترم ضيق المكان.. ولا الزمان ولا الزحام.. لجل السيجارة الكل عندى يتحرق.. ولجل كيفى الكل جنبى يتفلق.. مع إنى حاسس إن عمرى بيتسرق عام بعد عام.. إنسى إنك تقلدنى أو تسمع رفيق.. إن السيجارة تخف همك أو تسليك فى الطريق.. ولا أى كيف ممكن يفيد بس المفيد.. تسمع نصيحتى يا ابنى لك وابعد بعيد.. نار السيجارة فى يوم راح تحرقك.. تاكل فلوسك والحبايب تهجرك.. ولا حد يوم يسأل عليك.. وتشوف هوان الموت عينيك.. وكل ده كان بين إيديك.. تنسى أن يوم أنا قولتلك.. أدمنتها حتى انتهيت!!
