نفسى يا خلق الله تقولولى.. قبل ما أطق وأروح مبقاش.. أسمع رد بليغ وأصولى.. من غير لت وعجن بلاش.. ده أنا م الصدمة بقوا يغنولى.. ويقولوا يالى ما تتسماش.. بكره تلاقى عقلك منغولى.. وفكوا زرايرك فى الإنعاش.. أو تدخل واسمك مدبولى.. تخرج «نادية» بصوت متحاش.. بستغرب واسقط من طولى.. م اللى بيحصل ومشفناش.. لو قرية وليها عمدة وشيخها.. عمر غريب ما بيدخلهاش.. وان جه دخلها وشم طبيخها.. يدفع أجرة ما يسرقهاش.. مش دولة وليها دور وتاريخها.. وحضارة حاضرة ما ننكرهاش.. وبدل ما نقدر حضارتنا.. ونذكرها لأجيال مالهاش.. نهمل ونبدد ثروتنا.. علشان ملايين مبتسواش.. ونسيب لص يخرب بيتنا.. ونقول أصل الأمن مجاش.. والحجة إن الكاميرات قلت.. أو فيه أزمة ماشغلهاش.. أو روح «فان جوخ» ومن سنة ولت.. خدت الخش وسابت الخاش.. دى الأزمة إن أخلاقنا انحلت.. وفى ناس باعت قبضت كاش.. وضمايرهم مرضت واتشلت.. نسيوها ف غرف الإنعاش.. فى حاجات مخيفة كتير خلت.. ف كتير غير لوحة الخشخاش.. ما خلاص دنيا اللى اختشوا ولت.. مبقاش غير زمن الأوباش.
مدرس لغة عربية بمدرسة جمال عبدالناصر الثانوية
