أنا اللى كنت حمار وركبه مولانا.. وقال هاروح مشوار وهاتيجى ويانا.. وهتبقى عيشتك فُل.. وهتنسى عيشة الذل.. وعملت زى الكل.. صدقته أصل أنا.. أنا اللى كنت حمار واخترت مولانا !!.. حمار وماليش عقل.. مافالِحش غير فى النقل.. أنقل رئيس م العرش.. وأنقل رئيس للعرش.. وبقوّتى يبقى بكِرش.. وأعوانه يعملوا طُرش.. ما أنا اللى كنت حمار واخترت مولانا!!.. أنا اللى كنت طريق مفروش لسيدنا.. عدى فوقيه بجماعته علشان بقى يسودنا.. وعدى فوقى وزاد وهنّا حزبه معاه.. ناديت عليه سيدنا.. رد اللى كان وياه.. اسكت يا واد واتلم.. ما تشيّلوش الهم.. رديت بصوت موجوع.. وأنا بأموت من الجوع.. حاضر يا بيه هاتلم..ما أنا اللى كنت حمار واخترت سيدنا!!
القاهرة
