مصر هتجاوب وهتنجح رغم صعوبة الأسئلة.. بلدنا مذاكرة من زمان قبل المسطرة والمنقلة.. وكل ما تدخل امتحان تقول يارب وتقرا البسملة.. مصر محتاجة لدعواتكم داخلة على أصعب مرحلة.. مصر عايزة بر أمان أو طوق نجاة مش هرجلة.. بلدنا شبعت م الحوارات نشفان دماغ على هرجلة.. مش ناقصة لف ولا دوران اخلصوا وحلوا المشكلة.. مصر عايزة توب جديد تفصيل وخالص سرفلة..
أجيال وتاريخ بيسجلوا والغلطان فى مقصلة.. وقبل ما يفوت الأوان ونشوف كوارث وبهدلة.. لو حطينا الإيد فى الإيد هتبقى بسيطة المسألة.. تعالوا ناخد من غيرنا عبرة حوالينا كتير م الأمثلة.. قلبى وقلبك يكون على مصر هنشوف نتائج مذهلة.. حبوها كاش مش تقسيط حب الوطن مش معضلة.. امتى يا خلق ناخدها جد ونبطل شغل السبهللة.. يا شعب يا أمة مصرية زلزل ضميرك زلزلة.. مصر الكل مديون لها والحالة رافضة الجدولة.. قوم يا مصرى احمى وطنك قبل البكا والنحيب والولولة.
