حدود

عارفاك قوى...

وعارفة إن السكة بينا..

فيها جدارين..

أول جدار.. مصلوب عليه حلمى بلقاك

والتانى فارق بين حنينى وبين عنيك

لا الشوق يهزه...

ولا جمر نارى اللى ف ضلوعى..

قادر عليه..

وبزق فيه.. .

وبقوله وسع..

قرب المسافات ما بينا..

لو حتى خطوة....

أنا راضية بيها...

وباشتهيها...

وح اخطيهاله..

على رمش عينى..

وقلبى متحزم بشوقه...

ناوى ع الخطوة اللى جاية...

من يوم ما حسك قلبى

والسكة بين قلبك وبينه بقت له حلم

وجنة عاش يتخيل إنه يكونله فيها..

دنيا تانية.....

وهقوله إيه...

مش بس عاجزة ألجمه..

وأمد فى الحد اللى بين حلمه وبينك

لكنى....... عايزة..

ونبضه حاسس

بالرغبة فيا

ولما يجى الليل عليا...

يلقاك ممدد جوا منى...

يقولى شفتى....

مابقاش حدود بينك وبينه...

عايزانى ليه أفضل مكانى...

وتطول المسافات لقلبه..؟

لو كنت قادرة عليه وجامدة...

خرجيه من كل جسمك..

وانزعينى من ضلوعك

لجل تبقى أقوى منه

لو جد قادرة....

امنعينى أموت عليه...

وأموت ف حبه..

نجلاء مكاوى - المنصورة

باحثة سياسية مواليد المنصورة 1980، حاصلة على ماجستير فى الآداب