أنا طول حياتى عاشق وهايم.. بوحد فى دايم.. واحمى فى عرضك.. وامشى فى أرضك.. والفلف وادور!!.. مسحراتى وحافظ حيطانك.. صخورك وحجرك وريحة غيطانك.. بخورك وشجرك.. ومين اللى هجرك.. وحافظ دروبك.. ولحظة غروبك.. بغزل حروفى ليكى بدور!!.. مسحراتى وماشى بتغندر.. بسافر وعافر وهاجر كتاجر وشاه بندر.. فنان وراسمك على صدرى.. خطوطك شطوطك خريفك وصيفك.. وريفك وبندر.. دا ثانية بعيد عنك تساوى شهور!!.. مسحراتى وامشى ف شوارع واحضن بيوت.. بصبر وعزيمة نعدى نفوت.. عارف الملامح وقلبى مسامح.. وحافظ الوجوه.. ومين يا صبية يعشق ترابك وفيكى يدور!!..
مسحراتى وطول حياتى عاشق عيونك.. وربى يصونك.. وعمرى يا طاهرة ما افكر أخونك.. أروح المطارح.. دا حبك وطارح فى قلبى بذور!!.. مسحراتى وماشى فى ليلك كله أمان.. يا كل الأمومة ونبع الحنان.. رمشك سحرنى وسحرك فريد.. وابنك يغنى فداكى وشهيد.. دا انتى يا حلوة أميرة البحور!!.. مسحراتى وماشى بنادى.. جوا بلادى.. يا رب يا هادى.. خلى المكسل يصحى يقوم.. اصحى يا سيد انت وجلال.. ابنى وشيد ورزقك حلال.. وصلى لربك واسجد وصوم.. وانتى يا قاهرة.. يا ظاهرة يا طاهرة.. قامت ولادك وهبت تثور.. مسحوا دموعك قادوا شموعك.. وجرحس وأحمد بيبنوا الجسور!!.. مسحراتى ماشى بطبلة بضرب برن.. عنتر يا عبلة عاشق يحن.. ترابك سماكى.. نيلك هواكى.. وحبة حبة.. يا حلوة يا شابة.. الله محبة.. شوفى نصيبك.. هلالك صليبك.. ولا عين تصيبك حلاوة شبابك.. بيفتح فى بابك يقرا كتابك.. يلاقى السماحة بتطرح زهور.. وقلبى اللى عشقك مزهز بنور!!.. مسحراتى وطول حياتى ماشى فى أرضك بلفلف وادور!!
سوهاج ـ طهطا ـ عرب بخواج
