يا مثبت العقل ودينى من شر عبادك اكفينى
وبلاش وحياة النبى عندك بحكومة فاشلة تبلينى
وابعد عن جيبى وزير دايماً بينق بحقد فى تموينى
وابعد عن قلبى وزير تانى على كل مصيبة بيرمينى
ووزير بوظ قطنى المصرى وحوجنى للقطن الصينى
ووزير باع غازى وبترولى خف اللى قالولى دينى
خلاّ الكهرباء تقطع عنى ضلم بعمايله بتارينى
ووزير شاطر كل شوية بضريبة جديدة يرازينى
ويروح فى أوروبا يتعالج ويقول بعمل فحص لعينى
وأوروبا مش أفضل أبدا من خبرة القصر العينى
ووزير للصحة بسلامته سافر يعالج حبايبه وناسينى
لا وزارة الصحة بتشوفنى ولا فيها أدوية تشفينى
يا مثبت العقل ارحمنى واقبل دعواتى وارضينى
واقصف عمر اللى مغلبنى ومجرى الغلب فى شرايينى
وبيسرق صوتى وحالفلى فى اللجنة هناك ليورينى
ويوقف عسكرى علشانى إذا روحت اللجنة يرازينى
ويحط كلبشات فى إيدية وبمنديل ميرى يغمينى
ويطنش إذا شافنى بهاتى ويطنش إذا قولت احمينى
وعاملّى ملف بأوصافى ومسجل صوتى وعناوينى
وحاططنى فى القايمة السودا وعليها قصائد دواوينى
وعمل خطين تحت الصورة وخاططهم بالحبر الشينى
إسود وبيشبه أيامى اللى فى ظلامها ممشينى
يا مثبت العقل داعيتك علشان قولتلى عبدى ادعينى
مستنى إجابتك لدعائى وقاعدلك مستنى ادينى
يا تلبى دعائى يا تاخدنى يا تصبّر قلبى وتهدينى
