نفسى يا خلق الله تقولولى.. قبل ما أطق واروح مبقاش.. اسمع رد بليغ وأصولى.. من غير لت وعجن بلاش.. ده أنا م الصدمة بقوا يغنولى.. ويقولوا يا اللى ما تتسماش.. بكرة تلاقى عقلك منغولى.. وفكوا زرايرك فى الانعاش.. أو تدخل واسمك مدبولي.. تخرج «نادية» بصوت متحاش.. باستغرب واسقط من طولى.. م اللى بيحصل وماشفناش.. لو قرية وليها عمدة وشيخها.. عمر غريب ما بيدخلهاش.. وان جه دخلها وشم طبيخها.. يدفع أجرة ما يسرقهاش.. مش دولة وليها دور وتاريخها.. وحضارة حاضرة ما ننكرهاش.. وبدلا م نقدر حضارتنا.. ونذكرها لأجيال ملهاش.. نهمل ونبدد ثروتنا.. علشان ملايين ما بتسواش.. ونسيب لص يخرب بيتنا.. ونقول أصل الأمن ماجاش.. والحجة أن الكاميرات قلت.. أو فيه أزمة ماشغلوهاش.. أو روح «فان جوخ» من سنة ولت.. خدت الخش وسابت الخاش.. دى الأزمة ان أخلاقنا انحلت.. وفيه ناس باعت قبضت كاش.. وضمايرهم مرضت واتشلت.. نسيوها فى غرف الإنعاش.. فى حاجات مخفية كتير خلت.. ف كتير غير لوحة الخشخاش.. ما خلاص دنيا اللى اختشوا ولت.. مبقاش غير زمن الأوباش.
