أنا شفت واحد م الناس شايل همه.. قاعد ع الأرض فرد حرقوله دمه.. تعبان م اللى عملته فيه الأيام.. من حمل ولاده واخواته وأمه.. ظهره م الحمل يا عينى انتنى.. شاب وعنده ييجى ميت سنة.. ماديت إديا ناحيته عايز أساعده.. وعينيا راحت للى جنبه واللى بعده.. راجل ماعرفش ف يوم إيه السعادة.. شاب مسلوب الإرادة بيقول اشمعنا أنا.. ماليش حقوق وده بصلى وماقمش.. قلتله شكلك بيقوللى إنك متعلم اتكلم.. قالى اللى اتعلم زى اللى ماتعلمش.. واللى اتكلم ياريته سكت وما تكلمش.. قلتله بتحلم بإيه وعايز إيه.. قالى يا بيه دنا اللى زيى ما بيحلمش.. كررت عليه تانى السؤال ما فهمش.. قلتله نفسك ف إيه تتمنى إيه.. قالى نفسى أنام ف يوم وما أقمش.. أرتاح ف بيتى يومين بس قوللى فين.. ويومى تلاقينا هنا كلنا تحت الشمس.. والديابة ما بتحبش غير لحم الغلابة.. وف كل حتة فى جسمى عضة.. وكل لقمة باكلها مُرة خلاص بقيت ما سألش.. دول علمونى السكوت وكل يوم باموت.. من كلمة دايما يقولوها اخرس ما تتكلمش.. وسيبنى أنام سلام لسه الكلام ما اتقالش.
