لو كنت فلاح بتفلّح على غيطك مسى وصبح
واحنا من غيرك نسوّح وكلنا عايشين من كدك
لو كنت جزار بتجزر بلاش ع الزبون تشطر
اديله لحم مسكر واوعى الجشع ليشدك
لو كنت محامى وبتحامى ما تفرقش ما بين مصرى وشامي
ولا تخللى المجنى عليه جانى وطظ ف رشوة هتوصلك
وكنت صحفى وبتصحف اكتب كلام كله يشرف
وإياك تحرّف وتخرف أو تسمع كلام حد يوزك
لو كنت دكتور بتدكتر ما تخليش مريضك يتضرر
ولا تغللى الكشف ولا تقصر خليك فى التأمين زى عيادتك
لو كنت محاسب بتحاسب وتحت إيدك حوافز ورواتب
حاسب من أى مكاسب تسوء اسمك وتهزك
لو كنت مهندس بتهندس خليك صاحى ياريس
واوعى ضميرك يوسوس أو ينعس حافظ دايما على اسمك
لو كنت مدرس بتدرس علم فى الحصة كويس
واوعى تكروت وتهلس وتتكل ع الخصوصى يعزك ويذلك
لو كنت سواق بتسوق ماتطلعش بالأجرة لفوق
وخليك دايما حلو وذوق وتسوق «تاتا» وعلى مهلك
لو كنت صنايعى وبتصنع ماتخليش الشغل «مكلكع»
خليه فى إيدك يلمع ويلعلع يشرفك ويشرف بلدك
لو كنت فنان بتفنن وفنك بيهوس ويجنن
ضرورى لازم بتحسن ولا تحرمشى الناس من فنك
لو كنت ظابط بتظبط اوعى تلخبط أو تتلعبط
خليك بالناس متحوط علشان يشتروك
بشبيش - المحلة
