هَبْ ريح الانتخاب وانفتح للكدب باب
وابتدينا نشوف ونسمع الكلام من غير حساب
البلد صبحت ساحات لليفط والإعلانات
واللى زمّرْ واللى طبل واللى يرقص بالصاجات
قال: مرشح الحكومة إصحوا إن كنتم فى نومه
النجاح مضمون وعندى للحبايب فيه عزومة
فيها فتة ولحمة ضانى للى حيسقف عشانى
واللى حيهلل ويهتف له مكافأة شكل تانى
بكرة آخد الحصانة وأبقى نايب له مكانه
والجميع عارف شعارى النزاهة والأمانة
إحنا حزب الأغلبية إحنا م الطبقة اللى هيه
لما بنقول كله يسمع واحنا أهل المسؤولية
والمعارضة حالها حال المرشح عنها قال
إنحياز الأمن واضح دى حقيقة مش خيال
أى ندوة بيمنعوها والمسيرة عطلوها
كل شىء ممنوع وحتى اليفط بيقطعوها
حرموا حتى الكلام لبّسوا الناس اللجام
واللى ينطق أو يعارض يبقى خارج ع النظام
الفساد عم البلاد والمرض والفقر زاد
والطوارئ سلطوها سيف على رقاب العباد
وانا مش طالب مناصب واللا طمعان فى المكاسب
بس نفسى أشوف فى بلدى برلمان يعرف يحاسب
برلمان يحمى الغلابة فى بلد بقى زى غابة
الغنى بفلوسه يركب والفقير تاكله الديابه
وانتو ليكو الاختيار تبقى جنة تبقى نار
للمعارضة للحكومة انتو أصحاب القرار
واحنا ملينا العهود والأمانى والوعود
دا المعارضة والحكومة كدبهم مالوش حدود
دايماً احنا نكون ضحية وسط شلة بلطجية
فى انتخابات م البداية للنهاية تمثيلية
عضو اتحاد الكتاب
