يا مين يجيبلى مرارة تكون حديد بضمان.. شغالة بالكهرباء قوتها ألف حصان.. تتحمل الضغط وموتورها يكون جامد.. وليها صبر وجلد تنفع مع الإخوان!.. وتكون عفية وتقاوم تصريحات «عبود».. وإن جالى «حازم» تقوله الباشا مش موجود.. ولما تشوف «صبحى صالح» تبتدى تلطم.. من الكلام التقيل اللى ملهشى حدود!.. وبالها لازم يكون أطول من الدولى.. علشان تسامح الرزل وأبوغل والشوضلى.. زى ما قال الرئيس سامحونى هتسامح.. وتسامح ابن الرئيس اللى سبب عللى!.. أمانة اللى يلاقى مرارة صلب متين.. يجيب لى ميه وياريت يجيب لى منها متين.. هادى «البرادعى» أربعة ولـ«عمرو موسى» خمسة.. وخلى اتنين تلاتة ينفعوا لـ«حمدين»!.. و«أسامة حرب» هجيب له مرارة من جيبى.. علشان مؤدب وراجل دغرى وحبيبى.. و«إبراهيم عيسى» هسيبله عشرة فى الجورنال.. علشان مالوش فى النفاق وصاحبى وقريبى!.. ويا ريت تشوفوا مصنعين يصنعوا مرارات.. مليون مرارة فرقعت والباقى فيها حروقات.. ويا ريت كمان للطحان تجيبوا كام مصنع.. لزوم معالى الرئيس ورجوعه فى القرارات!
القاهرة
