المقاطعة
لما الجماعة يزايدوا والميزان يختل
والثورة تبقى غريبة والضمير يعتل
وتقولى اختار ملالى أو نظام مخلوع
تبقى المقاطعة الشريفة هى أحسن حل!!
ليه؟
ليه بس ياللى بتحكم تخلى حلمى بعيد
ده حلمى ضحى عشانه كام مصاب وشهيد
والثورة قامت وناجحة وأنت مش شايف
إن الشباب اللى جابك وأنت مانتش سيد!!
هنكمل
إياك تراهن يا حاكم إن الصعب بعيد
لمتنا جوه الميدان ونبقى إيد فى الإيد
وأحمد يقف جنب مينا والعزيمة حديد
دا الكل ناوى يكمل والعزيمة حديد!!
ولادى
فرحان بشكل الشباب جوه الميدان تانى
وكل كلمة فى هتافهم تمسح فى أحزانى
هما اللى أحيوا الأمل فى حلم كان مسروق
ماهو دول ولادى، وجيل ورا جيل، فرسانى!!
د. توفيق ماضى – الكويت
