لما تبقى يوم جريح.. انسى جرحك تستريح.. لما تملى الكون أمانى، وده بكل شىء يطيح.. لما تبقى الوردة مرة، والقمر يضيع فى ريح.. لما تبقى الطيبة سبة، والنفاق مبدأ صريح.. لما أحسك جنة حية، وقلبى ليها بيستريح.. لما تكتم كلمة حلوة، واللسان مشلول طريح.. لما أحبك وانت لأ، والسبب قرشين صفيح.. لما أغنى أحلى غنوة، والكلام يطلع جريح.. لما قلبى يظل يرجف، وانت تتكلم فصيح.. لما يهرب منى دمى، ودم أختى هنا يسيح.. يبقى كل شىء يضيع..
يبقى كل شىء وضيع.. لما اصرخ من الحنايا، وقلبى جوايا صريع.. لما أمشى ع السحاب، ويقولى لأ فى القطيع.. لما أشكى لنيلى همى، يجمد فى عز الربيع.. لما أبص فى وش بلدى، فاتكسف ودمعى يضيع.. لما امسح دم وشه، واكتشف أنه رضيع.... التخاذل والتنازل فى استكانة شعار فظيع.. لما تعجز الحضارة، والحجارة تستطيع.. لما ادير وشى عنهم.. يسألونى هما مالهم.. ويقولى سيبهم فى حالهم.. ده بيرقص، وده يبيع.. يبقى كل شىء يضيع.. يبقى كل شىء وضيع.. يبقى كل حرف فى كلمة حقيقتنا مريع.. ويبقى لما تبقى يوم جريح.. انسى جرحك تستريح !!.
