يا مستضعفين النملة أنا لازم أتغير.. لإمتى حفضل فى نظركم هزيل وصغير.. أجرى ورا أحلام خاطفها الريح.. متخبى فى ضلوعى خايف ومتحير.. أسرق عشايا من تحت أقدامكم.. رافض أعيش فى الجحر خدامكم.. أنا بكره حأترشح فى المجلس واتنافس.. وأغيظ كل الصراصير والخنافس.. وبفصاحتى حأنجح باكتساح.. حأطلع لسانى لأتخن تمساح.. حفضل أكافح مش هرتاح.. إلا لما أشوف البسمة فى عيون كل فلاح.. وانسى كلام جدى فى وادى النمل، لما قال إحنا منسيين ومالناش وجود.. حأكافح واعافر وأكد إن أنا موجود..
ومادمت أنا موجود.. تعترفوا بحضورى.. آن الأوان يا بلد أقوم فيك بدورى.. بس مش دور نملة هزيل ومستضعف.. شوفولى دور أكبر يشرف.. ماحدش فى دور النملة بيتكيف.. رافض أعيش فيكى متكتف.. بكره حاحل قيودى وأنجح.. وعلى مسرح الدنيا الكل حيشهد بأدائى ويسقف!
