مظلوم معانا دايماً يا نيل وعيونك بتنزف دموع بتسيل
من فجر التاريخ لينا بتدى وفاء وعطاء آية ودليل
مظلوم معانا ليل نهار تبذير وقسوة ما ليها مثيل
تلويث زبالة وحتى المجارى وبنرمى فيك جثة وقتيل
خراطيم مياه بترش الشوارع والست قاعدة بتشت وغسيل
ملاعب جولف ورد بيمصك وصرف متعرى تبخير وتقليل
بتروى الصحارى وتنعش حياة بتنور ظلام كهربا وقنديل
بتنقل حمولنا سفينة ومراكب وحتى همومنا معانا تشيل
أسماك وخير ورزق وسياحة بلسم زلال بيشفى العليل
شعوب بتغدر طمعانة فيك عايزين لمجراك يعملوا تحويل
عايزين يحرمونا شريان الحياة مش ممكن يا نيل عنك بديل
دا أنت روحنا وعزة وكرامة من غيرك حياتنا أكيد مستحيل
يمكن فى لحظة غفلنا عنك بتنسى القساوة وصفحك جميل
جواك تاريخنا من عهد آدم حاضر وماضى وعمرك طويل
كتب السماء ذكرت مكانتك موسى وعيسى قرآن وإنجيل
مليون عروسة جات بتاجها كانت بتطلب نظرتك تدليل
جاى بتجرى وتروى عطشنا تخضر شراقى وتطفى غليل
سامحنا مهما قسينا عليك صفاءك نقاء ك ونبعك أصيل
- سوهاج طهطا - عرب بخواج
