قولوا لمعالى الوزير تحرشات ممنوع.. وتبقى تدخل مباشر دوغرى فى الموضوع.. وضرورى تمسك لسانك عند كل حديث.. علشان هزار الوزير فى كلامه مش مشروع.. وخصوصاً أما تكون بتكلم الستات.. لازم تكون حضرتك فوق مستوى الشبهات.. ويكون كلامك حكم فى وسائل الإعلام.. وتكون كمان حضرتك قدوة لبنين وبنات.. وخصوصاً أما تكون محسوب على الإخوان.. زى «الكتاتنى ومرسى وسعد والعريان».. لازم يكون عندكوا لباقة فى حديثكم.. وتعظموه بالحديث وآيات من القرآن.. ماذا وإلا النيابة والقانون موجود.. وفيه صحافة كمان وقلق ملهش حدود.. ده غير فضيحة كمان فى وسائل الإعلام.. ومعدش فيه فى البلد واحد يقول مسنود.. وأنا بصراحة كده شايف عيوبكوا كتير.. فاشلين فى حكم البلد ومعندكوش تفكير.. وشوفت منكم حاجات تشيب الولدان.. تخلى روح الحليم تطلع من المناخير.. وإذا كان عليا أنا هاصبر كمان ساعتين.. علشان مرارتى خلاص طلعت من الجانبين.. وطحالى يمكن يفرقع من عمايلكم.. وهافضل أدعى عليكم لحد يوم الدين!
