فاكرة يا سينا الولد أبوقلب دايب م الهوى
اللى عشانك اتهرى طوابير وخدمة وانبرى
للرد على اللى اعتدى واحتل أرضك وافترى
ولا عمره فكر فى الغدا ولا مرة قال إيه العشا
وكان بيشرب بالغطا من زمزمية مبططة
وأكل جرايا مكسرة من الزبالة مبحترة
أنا يا سينا الولد أنا اللى هزيت القنا
أنا اللى ربيت العدا ورفعت راسك فى السما
وخليت ياجورى انحنى وجولدا مائير دورها انتهى
ولولا سوريا جابت ورا كان اليهود بقوا مسخرة
أنا يا سينا الولد لو هبقى عندى 100 سنة
ومنايا أشوفك فى هنا وأشوف بيوتك تتبنى
ولا أشوف جنودك تترمى ولا دم يجرى ع الثرى
وفى عيدك أفرح وأتغنى بحديث ولادك عنى أنا
الإسكندرية
