قالوا الفاصوليا بـ20 جنيه.. وكيلو الطماطم 5 جنيه.. غدايا فطارى مش لاقيه.. وعشايا عمرى ما حلمت بيه.. وأنا موظف غلبان يابيه.. مرتبى 500 جنيه.. طيب قولى اعمل بيهم إيه.. أدخل عيالى المدارس.. ولا الدروس أكبر كوارث.. ولا أجيب كسوة وهدوم.. أو أنزل مظاهرة وأقضيها.. فى معتقل ينسينى النوم.. كلام فى سرك ومن غير حسد.. فى ناس معاها ملايين.. وواكلينها وشبعانين.. وناس على الرصيف شحاتين.. وأهو كلنا فى بلد واحدة وعايشين..
يا إما غنى يا إما للقمة مش لاقيين.. وضاعت طبقة المتوسطين.. دول موظفين نايمين صاحيين متعكننين.. على لقمة العيش جاريين.. وعن الوعى مغيبين.. برادعى طلع.. جمال نزل.. هما همهم مرتب وتأمين.. مهى دى سياسة التعابين.. باعوا البلد وبكره يبيعوا البنى آدمين.. والحق ضاع وأصحابه مش لاقيين.. ثورة عرابى اللى كانت فى عابدين.. قامت لأنه كان من الرافضين.. لنظام الفاسدين.. وقف وقال احنا أحرار.. محناش تراث ولا عقار.. فى نفس المكان بس اتغير الزمان.. جت دلوقت ناس كتير عايزة تغيير.. أصلهم مظلومين ومدهوسين جوا بير.. امتى بقى هنشوف تغيير.. وضى شمس ينور المكان ويحقق التحرير.. دا حلم كبير.. مسيره يصير.. مسيره يصير.
قسم بيوتكنولوجى كلية العلوم
