هاكتم بقى وأسد ودانى.. حتى عينيا مش لازمانى.. وأدلع غمى وأقوله يا عمى.. وأزود من مفتاح ألوانى.. من صوت غريق جوه العبارة.. فى قلبه حريق وف حلقه مرارة.. طلعوا براءة بجاحة جراءة.. عشتى وعاشوا يا ست حضارة.. لحمى ودمى ف رقبة مين.. دعيت وعيالى تقولى آمين.. صرخنا وقولنا الحوت بياكلنا.. ما حدش رد يابنى آدمين.. وبكرة تلف الدايرة عليكو.. ويوم الآخرة عينى فى عنيكو.. وآخد حقى والله ما أبقى.. ومش راح ينفع عض إيديكو.. وأنا بينى وبينكم تار وجدار.. شوفوا صواركو فى أى رادار.. مش متحمل بس مكمل.. وامشى معاكو لباب الدار.. رقصة وفيلم وشغل مؤلف.. وراجل دافع قصدى مسلف.. مسرحية لشعب ضحية.. جوارى تطبخ سيد بيكلف.. سافر يهدا الرأى العام.. واحكى الجثة وقعت بكام.. لزم الأمر ابعتلك عمرو.. وقول بتعالج عندى زكام.. بعدك خربت ضبا وسفاجا.. حقيقى بلدنا ليك محتاجة.. قوم يا مبارك خلص تارك.. إيدنا فى إيدك أعمل حاجة.. وحقيقى برافو عليكو بجد.. ومعبد مين اللى هايتهد.. دا يمكن بكرة تجيلهم فكرة.. نصلى الجمعة يوم الحد.. عزرائيل بقى له مناديب.. لما بيحرس غنمك ديب.. ودى عشر تسطر ربنا يستر.. أنا ولا شاعر ولا ابن أديب.
باكوس
