والدى وجارنا الشيخ مختار أصحاب والدار جنب الدار
يجمعهم أكل العيش والملح والميه فى قلة من الفخار
يلعبوا سيجة أو تحطيب من غير فتوى تودى النار
ولما يهل هلال رمضان الكل يهنى لسابع جار
سبعة يناير خدنا إجازة البهجة تعم صغار وكبار
فى «البلابيصا» الشمع يقيد فى طريقه ينور للأحرار
هى كنيسة تصلى لمصر واللى المسجد عنده منار
خلف المصرى حضارة عظيمة يوم ورا يوم نكشف أسرار
الكراهية دخيلة علينا اتعلمناها من الأشرار
طيور الظلمة تحوم حوالينا وياما فيها العقل احتار
قتل وسحل وقلة قيمة عمر المصرى ما كان جزار
طبعه الحب رهيف القلب لسانه الحلو يزيده وقار
نجع حمادى- قنا
