كل الدنيا تميل على ميلك.. مش قادرة ترد جميلك.. ناس هناك بتغنيلك.. وناس هنا منورة ليلك.. قدم السعد، صدق الوعد.. باتبارك بيكى يا حبيبتى.. خدينى من يمينى.. ودارينى فى ضلك.. على صدر حنين ضمينى.. دوبينى قوى فى ضلعك.. دا فى حجرك أنا حبيت.. وعشت الدنيا وحبيت.. ورضعت الخير، وعشقت النور.. وإن تعبت، إنت طبيبتى.. دا كتاب الله بيوصينى.. عربى، أفرنجى أو صينى.. عليكى ياما حضنتينى.. بدعاكى ياما حصنتينى.. ورسول كريم قلبه عليكى.. ومخليكى فى حسن صحابتى.. دا رضا الوالدين.. وصية فى كل دين.. بر وإحسان، وطاعة وحنان.. ورد وفل على الخدين.. تعبتى كتير، وقاسيتى كتير.. فى طفولتى كلها وشبيبتى.. هاتى عينيكى أشوفها.. دا كل الخير قدامك.. هاتى رجليكى أبوسها.. الجنة تحت أقدامك.. بكل إيمانى، وطول زمانى.. يطول عمرك يا حبيبتى!!
