ناس عايشة وراضية فى كل الأحوال.. وناس ميعجبهاش حتى المحال.. ناس بتاكل فول وتلبس خيش وتقول نعمة يارب احفظها من الزوال.. وناس تدوس على النعم وتاكل لحم البشر ومن العظام عملت تلال.. ناس تسكن فى أوضة ومقابر وتقول آدى ركن مدارى العيال.. وناس تسكن فيلات وقصور وتقول نغير علشان «توفى» مش عاجبها المكان.. ناس بتشكى بأعلى صوت واللى جمبهم مش سامع لهم كلام.. وناس بكلمة وجرة قلم تزلزل الدنيا وتهد جبال.. ناس بتغرق فى طوابير وزحمة وفى الطريق كتر السؤال.. وناس بتكنز للخلود وكأن النفوذ بيقتلها الزوال.. ناس حتشوف أيوب اللى تمثل ليهم أعالى الأمثال.. وناس مع فرعون وقارون اللى عبرتهم كانت ليهم أسطورة من وحى الخيال.
