شمس الحب إزاى هتغيب؟! لمَّا هلالنا جنبه صليب
إحنا يا سيدى الشعب الأوحد عنده شعار الحب نصيب
وحدة شعب عايش بيغنى بيعزف حب بلحن طريب
كلمة فتنة خيال أعداء عايزة تنشر شر رهيب
عايزة تنخر جوا نسيجنا زى السوس بسم دبيب
اللى يقولك فتنة دا حاقد عايز يفتح باب تخريب
مركبنا ماشية لبر أمان موسى محمد عيسى حبيب
مادام الحب عايش ف الشعب نار الغيرة تموت تعذيب
مهما عدت موجة أو ريح مصر حاميها المولى رقيب
شوف الحب بألوان ثابتة لو فنان أو كنت أديب
ياما متآمر حاول يفتن باب الحب ما فيه تسريب
مهما حاقد جاى يبعدنا إزاى ريح لجبل تذيب؟!
اسأل كل تاريخ هيقولك الحب ف مصر بييجى يطيب
أحمد عند الأزمة يلاقى جرجس جاله بسرعة مجيب
جرجس يصرخ آه م الشوكة يلاقى أحمد جنبه قريب
لمَّا الروح تتنفس حب يبقى إزاى يفتنها غريب؟!
ياما مستعمر حاول قبلك شاف وحدتنا شعره يشيب
أقسم إنى دا شعب موحد مش رايح فيه ينفع تجريب
رجع يجر ثياب الخزى ومهما حاول غدره يخيب
ثورة سعد أكتوبر يشهد لو كان عندك شك مريب
لو شعب اتفكك راح يتهز أهداف أعداء تنجح وتصيب
رايح يبقى ضعيف متعرى زى فريسة ف وش الديب
دا إحنا شعب الحب الأزلى فينا سر الحب عجيب
فصيلة الدم ترابنا ونيلنا لو فيه جرح- الحب طبيب
إنجيل بيسامح قرآن يصفح يبقى إزاى الحب يغيب؟!
سوهاج - طهطا - عرب بخواج
