بقول الفقر مش عيبة.. ولا خيبة ولا ويبة.. دا يحنى الضهر من طوله ويكسر هيبة الشيبة.. سنين وإيديا فى أرضى.. أصون أرضى كما عرضى.. ومن عرقى بتتشرب ومن خيرها دوا مرضى.. إذا وصلت لشىء سافر.. وصار الجوع دا جوع كافر.. ولقمة بتيجى م الصندوق بقايا أكلكوا الفاخر.. وريحة طبخكم هلة..
وقايد نارى ع الحلة.. وكام زلطة وكام طوبة أغمس م الهوا ذلة.. مسيرى فى يوم وهطلعلك.. على كفى شايل قبرك.. ومن جوفى النفس صارخ يهز الكرسى فى قصرك.. مافيش حد يلوم جايع.. لقهر سنين خلاص بايع تودع نومك الهادى وهتنادى مافيش سامع!!
