تعمل إيه لواحد خانك!.. وانت ياما إديته ياما.. تعمل إيه لو عض إيدك!.. اللى مديتهاله ياما.. واللا جاب سيرتك بسوء.. وأنت بين الناس علامة.. واللا قام غزك ف ضهرك.. وانت مديلة السلامة.. واللى قام شوه ف صورتك.. زى أفلام الدراما.. واللى جاب سيرتك ف غيبتك.. بالنميمة والدمامة.. واللى باع نفسه وضميره.. مش حاينفع فيه ملامة.. واما بتواجهه بحقيقته.. تبقى صَفْرا الابتسامة.. واما يتأسف ويعلن.. إنه شاعر بالندامة.. وإنه كان غلطان ف حقك.. وإنه كان شايف غمامة.. وإنه مش قاصد يضرك.. ولا يطعن ف الكرامة.. وإنه كان زعلان وساكت.. لما كلمته بصرامة.. تعمل إيه.. تقطع لسانه!.. واللا حاتلفه بكمامة.. بس تاخد حرص منه.. وإوعى تغفل عنه ياما.
