بتهبب إيه؟ يا سعادة البيه.. فى البنى آدمين.. قالهالك أبوك.. وبقولهالك.. باسم الملايين.. المطحونين.. المنداسين.. تحت الرجلين.. حايروحو لفين وحاييجو منين؟.. من بعد ماتاهو سنين وسنين.. من بعد ما عاشو مرار الذل ف كل مكان.. من تربة لغربة لبرد لشرد لطمى لطين.. وافترشوا الأرض وروسهم دابت فى الأسفلت.. والتحفو السما والسما ضمتهم جوه العين.. واتحملوا ياما عشان يقدرو يبنولهم بيت.. يحميهم من شر الدنيا وظلم الظالمين.. ويا دوب هايحسو بطعم الحلم اللى انتظروه.. واللى حايجنوه من بعد تعب وعرق وأنين.. تطلع بقرارك وعوارك دايس ع الكل.. وتشل عروق الحلم ف دم المصريين.. يا سعادة البيه.. بتهبب إيه؟.. الله يهديك.. دستورنا بيحمى.. الملكية.. ليه أو ليك.. عايز أشكيك لكن ماعرفش لمين أشكيك.. إلا لله أدعوه فى علاه والناس هايقولو ورايا.. آمين؟!