بالفيديو..خالد عبد الله: باسم يوسف يهدف لهدم الرموز الإسلامية

هاجم خالد عبد الله، مقدم برنامج «مصر الجديدة» على قناة «الناس»، مساء السبت، الإعلامي باسم يوسف، مُقدم برنامج «البرنامج» على قناة «سي بي سي» وقال إنه «خبيث يهدف لهدم الرموز الإسلامية».

وقال «عبد الله» في برنامجه إن «هناك أفكارا دائما من بعض الخبثاء الذين يعملون في الإعلام، يقولك في البداية انتقد العاملين بالقناة ورئيس القناة، وأطلب من عماد أديب يرد عليا ويبهدلني، والعاملين بالقناة يقولوا هنرفع عليك قضية سب وقذف»، مضيفاً: «كل هذا في مقابل إني أهاجم رئيس مصر بعنف».

وأضاف: «ويقولنا هنزل حلقتي على يوتيوب نظراً للمشاكل مع القناة، على عمو الكلام ده أنت عارف هما بيدفعولك كام».

وتابع: «شيوخي أوصوني إني مش أرد عليك رد عنيف، يا عم (سوسته) هبعتلك فيديوهات لبعض القساوسة بيسبوا دين الجيش، وبعضهم بيمرمط في الرئيس والقرآن على يوتيوب، يا ترى الحلقة اللي جاية هتعرض كلام الناس دي، ولّا لأ؟ انتظر منك تطلع القساوسة وتجيب نجيب ساويرس وتطلعلنا كتكوت وبيضة وتتريق عليهم زي ما بتتريق على المشايخ علشان نقول إنك راجل موضوعي مش منحاز لفئة على أخرى».

وأكد أن باسم يوسف يهدف إلى إسقاط الرموز الإسلامية «علشان الجيل القادم من الشباب يهين الرموز دي، وميتأثرش بيهم».

واختتم بقوله: «عدلاً خليك راجل واطلع اعمل كده واتريق على القساوسة والبرادعي سيدك، وحمدين صباحي واحد خمنا، هما كل دول ملهمش سقطات إعلامية علشان تسيبهم وتمسك في المشايخ بس؟».

وانتقد باسم يوسف في حلقته ببرنامج «البرنامج» على قناة «سي بي سي» عبد الله بدر، وخالد عبد الله و طريقة حوارهما على شاشات التليفزيون، وطريقة مهاجمتهما لمعارضي الرئيس مرسي، والمعارضين لسياسة التيار الإسلامي.

ووجه باسم يوسف رسالة إلى مؤيدي الرئيس قائلاً: «اللى فاكر إن مصر هايمسكها جماعة واحدة (فوق), لو فاكر إن مصر ها ترجع للى فات (فوق)، لو شايف إن مصر صغيرة و محتاجة إرشاد (فوق)».