زياد وبلال أخين حلوين بيحبوا خالتهم جدا، وبيروحوا عندها كتير يلعبوا مع ابنها ميزو صاحبهم الأنتيم.. ميزو ولد لذيذ بيحبهم جدا، وهما كمان بيه مغرمين كان أكبر منهم شويه صغيرين، وكان بيحب الكورة جدا ومن المتميزين فى التمرين بس الكابتن كان دايما يقوله إنت ضعيف لازم تتغذا كويس وتاكل أكل مفيد، وكان زياد يحب دايما يروح يتفرج عليه ويشجعه يقوله ميزو يا لعيب.
أخبار متعلقة
وفى يوم رجع الأخين الحلوين من المدرسة جعانين مامتهم قالت حالا والاكل هيكون جاهز، يدوبك نغير هدومنا ولإيدينا نكون غاسلين، وجهزت أحلى سفرة وعليها الأكل المفيد كوسة ولحمة جميلة وطبق الارز المفلفل وكمان السلطة مليانة بالفيتامين.
بص بلال على الكل وقال إيه دا مش واكل مبحبوش، أنا هعمل سندوتش نوتيلا الجميل، وزياد قال مبحبش الكوسة هاخد اللحمة والأرز بس قالت مامته طب حط عليها السلطة قال دا مستحيل، استغربت مامتهم جدا وزعلت وقالت كنتم بتاكلوا كل الخضار ايه اللى حصل فيه سر أكيد.
فضل الحال دا يوم ورا يوم والأخين الحلوين للخضار مش واكلين، فهمتهم مامتهم إن كدا أكلهم مش صحى وهيتعبوا ومش هيكون عندهم نشاط وقوة للعب اللى بيحبوه لان جسمهم محتاج الفيتامين عشان يستفيد.. بلال ضحك وقال لا أكيد ميزو مش بياكل الخضار وبيلعب ونشيط قالت مامتهم عشان كدا كل شويه تعبان ولسه كان عند الدكتور.
قال زياد والدكتور قال له إيه.. ردت مامته تعالوا نروح نزوره ونطمن عليه بس لازم ناخد حاجة نفرحه بيها، قال بلال أنا هجيب ليه شيبسى وعصير، وزياد قال ويا سلام بقى إندومى وبيبسى دا كدا هيهيص، مامتهم قالت بس دا أكل مش مفيد إحنا ناخد فواكه عشان تغذيه، ضحك الأخين الحلوين وقالوا مش هياكلها يا ماما احنا عارفين، وصمموا على رأيهم.
ولما دخلوا عليه وكان تعبان ومش قادر حتى يفتح عنيه، قالوا ليه شفت جبنا ليك إيه، قال لهم شكرا بس مش هينفع آكلهم، الدكتور قال لازم الأكل يكون صحى ومفيد، سأله بلال هو إيه اللى حصل ليه؟.
حكى لهم ميزو وقال كنت رايح التمرين الصبح ونزلت من غير ما افطر أو حتى أشرب الحليب، واشتريت شيبسى وحلويات وأكلتهم فى الطريق، ولما ابتدا التمرين بطنى وجعتنى جامد ودخت ومكنتش شايف الكورة رايحه فين، الكابتن جابلى الدكتور فى النادى وقال لى إن اللى عملته دا غلط خطير وإنى لازم أهتم بأكلى وصحتى وآكل الخضروات والفواكه عشان كلها فيتامين وللجسم بتفيد، والكابتن قالى إنى مش هانزل الماتش الجاى وهيخلينى احتياطى فى الفريق وأنا بجد زعلان وحزين ووعدته إنى هاكل أكل صحى ومفيد، وساعتها عرف زياد وبلال إنهم غلطانين وإن لازم ناكل كل الأكل الصحى والمفيد.
