تحدث المخرج مجدي الهواري عن بكاء اللاعب مؤمن زكريا أثناء عرض مسرحية «علاء الدين» وترحيب واحتفاء الفنان أحمد عز بحضوره، قائلًا إن «دور الفن هو مساندة الفنان والإنسان لأخيه».
أخبار متعلقة
وقال «الهواري» عبر «انستجرام»: «فيه كلمتين من قلبي عايز أقولهم يا جماعة، أولا أنا متفائل لأن الناس لسه عندها استعداد تتحمس وتشارك وتتفاعل في أي حاجة فيها فعل وعمل إنساني، بس مستغرب أن بعض الناس شايفة الموضوع جديد على الفن، لا خالص! يا جماعة دا دور الفن، لأنه ببساطة هو الحياة والحياة من غير الإنسانية مش حياة.. ياريت نتذكر أن رسالة الفن مش بسيطة وسهلة زي ما بعض الناس فاكرة لا دي ضرورية ومهمة جدًا لأنها باختصار واجبة الحدوث وبتحرك قلوب ومسؤولة عن إسعاد الناس وتقديرهم، والحمد لله أهو كان مبسوط امبارح وسعيد بالعرض وتكريمه يبقي كده (جول) لينا الحمد لله».
تابع: «الحراق مؤمن زكريا حبيب القلوب والله دي أقل حاجة نقدره بيها، قلوبنا معاه كانت بتتقطع امبارح عليه، ربنا يشفيه ويرجعه تاني يمتع جمهوره وكلنا بندعيله، وكل فرقة (علاء الدين) امبارح كانت بتعمل دورها في المجتمع برسالة حب من الفن المصري إلى الإنسانية.. اطمنت أننا لسه عايشين والله يا جماعة لما الناس قامت تصقف ربع ساعة علشان بتقدر مؤمن وقلوبها معاه حاجة جميلة من جمهور واع ومثقف ومحب للفن وبيقدر للأخر الفنان». وعن دراسة اتحاد كرة القدم إقامة ممر شرفي قبل مباراة اليوم بين فريقي النادي الأهلي والزمالك لتكريمه -والتي تعقد الساعة التاسعة- قال: «كده احنا عملنا دورنا، دا دور الفن يا جماعة بس اللي يفهم».
وختم قائلًا: «لما بكيتم اتقطعت قلوبنا، الحمدلله على نعمة الإحساس، شكراً فرقة علاء الدين ربنا يجعل دايما قيمة الإنسانية في قلوبكم وتكونوا ديما سفراء الفن المصري».
يذكر أن المسرحية تعرض منذ عام ٢٠١٩، من إخراج «الهواري» وتأليف حسن المهدي.
