تقدمت أسرة نادر السعيد عاشور، سائق التوك توك المتهم بقتل منسق حملة سليم العوا، بتظلم إلى المحامى العام لنيابات المنصورة تطالب فيه «بالعدالة فى التحقيق مع ابنهم بعيداً عن ضغوط الإعلام والسياسة».
وقال السعيد عاشور، والد المتهم، فى تظلمه «ابنى إنسان غلبان وليس له فى السياسة ولا الأحزاب، وعايش فى حاله وبيجرى على رزقه، وحظه العثر هو اللى جعله يصطدم بالضحية بسبب الظلام، لكن بتوع السياسة عايزين يستغلوا الموقف ويحولوا القضية لرأى عام وتصفية حسابات لتحقيق مكاسب دعائية على حساب مستقبل ابنى». مطالباً بنقل القضية إلى مكتب المحامى العام بعيداً عن ضغوط السياسيين.
والتقت «المصرى اليوم» المتهم المحبوس على ذمة التحقيقات، الذى انهار أثناء الحوار، نافياً تهمة القتل العمد، مؤكداً أنه اصطدم بالمجنى عليه عن طريق الخطأ بالتوك توك الذى يقوده، نافياً معرفته بالمجنى عليه أو بسليم العوا، مرشح الرئاسة.
■ كيف وقع الحادث؟
- أنا كنت ماشى بالتوك توك يوم السبت الماضى على كوبرى حربى بميت غمر، تقريباً من 8 إلى 9 مساءً والمنطقة كلها ضلمة ومفيش فيها إضاءة، وفجأة لقيت شخص أمامى ماشى فى اتجاه دقادوس ولا يفصلنى عنه سوى أقل من متر، وحاولت أتفادى الاصطدام به لكن للأسف اتخبط فى المرايا فى رأسه وبالفانوس فى الجسم وسقط أمامى على الأرض فوقفت فترة قصيرة خايف أقرب منه، وفكرت أهرب لكن خفت من ربنا أحسن يجرى له حاجة فحملته ونقلته لمستشفى ميت غمر.
■ وماذا حدث بعد ذلك؟
- لما وصلت المستشفى لقيت واحد صاحبى قلت له إنى لقيته مرمى على الطريق مصاب، فنقلته للمستشفى وأنا والله ماكنش قصدى أكذب أو أهرب لكن خفت أحسن الموضوع يكبر وأتعطل وأدخل فى «س وج»، وأنا راجل أرزقى على باب الله وماليش مصدر رزق غير التوك توك، وعندى ولدين 4 سنوات و6 شهور، ووالدى رجل مسن، ولو مارجعتش لهم البيت برزق مش هيلاقوا العشاء، وبعدين أنا ماسبتش المستشفى إلا لما اطمئنيت إنه هايبقى كويس وعلقوا له محاليل، وافتكرت الموضوع خلص.
■ لكن المجنى عليه مات فى اليوم نفسه مما يعنى أن حالته كانت خطرة؟
- والله ما كنت أعرف، الدكاترة قالوا لى اطمأن هايبقى كويس، ومشيت بعد ما واحد وضع بطاقته فى المستشفى علشان يتابع حالته، ويتصلوا عليه، لكن فوجئت بعد كده بأن الراجل مات وأنا متهم بقتله فخفت أكتر لأنى والله راجل غلبان أوى ولا أعرف اسم الراجل ده ولا عمرى شفته، وأنا مؤمن أن ربنا هيظهر الحق فى النهاية.
■ إذا كان الموضوع مجرد حادث لماذا تم توجيه تهمة القتل العمد لك؟
- لأن أسرة المجنى عليه مصرة إنى قتلته علشان السياسة، لأنه بيشتغل مع مرشح للرئاسة اسمه سليم العوا، وأنا والله العظيم ما اعرف المجنى عليه ولا أعرف المرشح ده إلا من التليفزيون زى ناس كتير، لكن علشان المرشح الناس عايزين يحولوها لسياسة وتصفية حسابات، وأنا فى الآخر غلبان وخايف يدوسوا على علشان يهدوا بتوع السياسة دول.
■ هل أنت عضو بأى حزب أو جماعة سياسية؟
- أنا عمرى ما انضميت لحزب ولا جماعة، أنا غلبان وباسعى على رزقى يوم بيوم أنا حتى ما اعرفش أسماء الأحزاب، ولا حتى أعرف المرشح ده تبع أى حزب والله العظيم أنا ماقتلتش الراجل ده، والله كانت مجرد حادثة وياريتنى ما خفت ولا مشيت يمكن كانوا ساعتها صدقونى أرجوكو تصدقونى، أنا عمرى ما دخلت حزب ولا رحت انتخابات إلا انتخابات الشعب اللى فاتت لما قعدوا يقولوا لو بتحب بلدك لازم تنتخب، فقلت أروح وخلاص حتى أنا رحت يوم واحد بس ورفضت أروح الإعادة علشان ما اعطلش التوك توك لأنه مصدر رزقى أنا وولادى وأبويا الغلبان.