بيبو ولد جنان، ذكى ونشيط كمان، يحب اللعب والجرى فى كل مكان، بس برضه كان بيزعَّل ماما كتير عشان مش بيهتم بالأسنان. الدكتور قال إن بيبو عنده سِنّة صغيرة عن باقى الأسنان ضعيفة ومحتاجة اهتمام، ومحتاجة إنه ياكل كتير أسماك وخضراوات وفواكه، وكمان لبان، بس طبعا بيبو كان دايما على كباية اللبن الصبح فى خناق، ماما تحضر ليه الصبح الفطار، وأول ما تحط اللبن يقول مش عايز دا بتاع الأطفال، أنا خلاص كبرت، مامته تقوله إزاى دا اللبن كلنا لازم نشربه عشان يقوى العظم والأسنان.
أخبار متعلقة
لكن بيبو يغضب ويقول محبوش ومشربوش ويسيب الفطار كمان، كل يوم عل آد الحال، مامته يوم تقوله يا حبيبى لازم تشرب اللبن وأسنانك كدا مش هتكبر وهتكون ضعيفة زى ما الدكتور قال، وهو برضه مفيش اهتمام، وقالها يا ماما أنا أسنانى تمام، تزعل مامته منه عشان طبعا بتحبه وخايفة عليه وهو يقعد يفكر ويقول أنا كل يوم ماما بتزعل منى عشان اللبن والفطار، أعمل إيه، وحل الموضوع دا إزاى، وقعد يفكر ويفكر لحد ما جت القطة مشمش، القطة بتاعته تلعب معاه، قال بس أنا عرفت هعمل إيه، هحط اللبن بتاعى كل يوم لمشمش وماما بكدا تكون منى مبسوطة أكيد.
وتانى يوم الصبح أول ما مامته جابت الفطار واللبن، على طول حط الأكل واللبن لمشمش واطمن إن كله تمام، رجعت مامته سألته: خلصت فطارك يا بيبو وشربت اللبن كمان؟ سكت ومعرفش يرد لأنه عارف إن الكذب مش من الأخلاق وحرام كمان وبقى فى حيرة وموقف مش تمام، وقال وهو بيتلجلج فى الكلام: بصراحة لا، حطتهم لمشمش يا ماما. قعدت مامته معاه وقالته إن أسنانه ضعيفة، والسِّنة الصغيرة اللى عنده لازم تكبر عشان يعرف ياكل عليها.
وفى يوم وهو بيلعب رجع وقال لمامته إنه عايز تفاح، جه يقطمها بأسنانه معرفش وحس بوجع كبير والسِّنّة الصغيرة الضعيفة لونها بقى غامق عن باقى الأسنان، اتخضت مماته عليه وجريت معاه على الدكتور، وقال السنة دى ضعيفة جدا، لازم كل يوم تشرب كوباية لبن، وطبعا ونمنع الحلويات وناخُد بالنا ومش هناكل أى حاجة ناشفه زى التفاح لحد ما السنة تكبر وتبقى تمام. عرف بيبو إنه لازم يكون سامع للكلام وإن الأسنان اللبن ليها غذاء، ويوم ورا يوم كبرت السنة الصغيرة وقويت بقيت الأسنان بعد ما بيبو حافظ على كوباية اللبن كل يوم وسمع كلام الدكتور.
