ملك بنت جميلة شطورة فى المدرسة، بس شويه شقية وعنيدة، دايما تلعب مع أصحابها على طول وكانت مبسوطة معاهم جدا وكلهم بيحبوها، وفجأة ملك اتغيرت أوى وبقت بتعمل حاجات غريبة مكنتش بتعلمها قبل كده، بقيت على طول لابسة طاقية على راسها ومش راضية أبدا تقلعها فى المدرسة أو فى الخروج، الكل كان مستغرب ويقولها إنتى ليه لابساها على طول، تقول كدا أنا عايزه كدا، الميس قالت لها مينفعش تفضلى لابسة الطاقية جوا الفصل، ولو جيتى بكرة بيها مش هدخلك الفصل.
أخبار متعلقة
روحت ملك حزينة ومتضايقة وقالت لمامتها إنها مش عايزة تروح المدرسة تانى، ولما سألتها ليه قالت لها عشان مش عايزة أقلع الطاقية، قالت مامتها دا نظام المدرسة ولازم نمشى عليه وإنت مكنتيش بتحبيها كدا، والموضوع دا فيه سر مش هتقولى عليه.. سكتت شوية ملك وكان عندها كلام كتير تقوله بس مش عايزة وقالت مفيش حاجة.
وتانى يوم الصبح وهى بتلبس الهدوم لبست جاكت وليه كابيشو، مامتها قالت لها إحنا فى الصيف والجو حر وهى برضة مصممة، حست مامتها إن فيه حاجة مش طبيعية، وإن فيه سر فى الطاقية راحت للمدرسة وقابلت الميس وسألتها عليها، قالت ليها ملك مابقتش كيوت، بقت على طول بتضرب أصحابها وكمان بيزعلوا منها وعلى طول بيشتكوا منها. الكل بقى مستغرب هى ليه بتعمل كدا، ولما نسألها تقول مكنش قصدى أنا بهزر معاهم وبتكون لابسة الجاكت والكابشو والجو حر وبتكون حرانة وعرقانة ولما حد يقول لها اقلعيه مش بترضى أبدا، ومرة صاحبتها بوسى بتهزر معاها وشدت الطاقية راحت ضارباها ضربة قوية.. استغربت مامتها جدا وقعدت معاها فى يوم بالليل وسألتها: تفتكرى إحنا بنلبس الطاقية ليه؟، قالت عشان ندارى بيها شعرنا وميبقاش باين، فهمت على طول إن فيه حد من أصحابها اتريق على شعرها وإن هى حبيبتى متضايقة جدا، وكانت زعلانة عشان كده كانت بتضايق أصحابها لأنها معرفتش تعبر عن مشاعرها اللى جواها ومش عارفة هى بتعمل كدا ليه.
أخدتها مامتها فى حضنها وقالت لها بس الطاقية عشان تحمينا من الشمس، والكابيشو من البرد مش عشان نغطى شعرنا، لأن إحنا مش المفروض نغطيه بالطاقية. قالت بس هو شكله وحش، ردت عليها مين قالك كدا؟ ردت بسرعة وغضب شديد أصحابى فى المدرسة قعدت مامتها تفهمها إن شكلها جميل وشعرها كمان وإن كلام أصحابها مش مظبوط وإن بكرة هنعمل تسريحة جنان، وفعلًا تانى يوم راحت المدرسة وكانت واثقة فى نفسها، ومامتها راحت معاها واتكلمت مع الميس. وعرفوا هى ليه كانت ملك بتعمل كده، وكمان فهموا أصحابها إن اللى حصل دا شىء مش مقبول منهم، وإن مينفعش نضايق بعض بالكلام، ورجعت ملك الحبوبة اللى كل أصحابها بيحبوها وقالت للطاقية باى.. أنا بشعرى مبسوطة.
